KANYAAH INDUNG BAPA

Jalma mah gues puguh deui

Ka anak tangtu nyaahna

Malahan apan sato ge

Saumpama ditengetan

Hayam nu keur anakan

Lamun anakna diganggu

Napsuna estu pohara

Manggih hakaneun saeutik

Dibikeun ka anak heula

Kajeun manehna mah engke

Sieun anak kalaparan

Eta di sato hewan

Jalma mah leuwih ti kitu

Nyaah asihna ka anak

Mun anak dipareng gering

Kurang sare kurang dahar

Jaba tatamba ka dokter

Henteu ngitung karugian

Asal anak waluya

Ti keur leutik terus-terus

Nepi ka anak sawawa

Nu matak omat anaking

Ka indung bapa sing bisa

Budi basa kudu hade

Ulah mungpang ka papatah

Sangkan salamet awak

Sabab pangdu'ana indung

Diijabah ku Pangeran

Ka bapa nya kitu deui

Sabab mun rengat manahna

Tegesna mun anak gering

Ka bapa wani ngahina

Atawa henteu sopan

Tangtu dibendong Yang Agung

Hirupna moal jamuga

Posted in: SASTRA